Öküz  sözünü eşitcək iqtidarın və ya müxalifətin ünvanına tənqid və ya təhqir eşitməyə hazırlaşma, zira söhbət adi əhliləşdirilmiş, fəqət öz üsyankar təbiətini qoruyub saxlaya bilmiş faydalı ev heyvanından gedir. Hansıları ki, İspaniyanın Pamplona şəhərində ildə bir dəfə boynuna zınqırov asıb dar küçələrə qovub çıxarırlar. Bu zaman binəva öküzlər görürlər ki, hamı bağırır, onların önündə isə xeyli ikiayaqlı məxluq qaçışır. Qaçışsa yaxşıdır, həm də gicişir, sataşır, deyir ki, gəl üstümə. Öküz isə elə məxluqdur ki, sataşanın cavabını verməyə öyrəşib. Öküzlər düşür gicişən ikiayaqlı məxluqatın üstünə. Onlara isə sən demə elə bu lazımmış, başlayırlar itələşə-itələşə qaçmağa. Kimisi sürüşüb yıxılır, kimisini öküz vurub aşırır və tapdayıb keçir, kimisi sona qədər qaçıb dar küçələrdən çıxır geniş meydana və öküzün görmə dairəsindən çıxır.

 

Nə baş verir? Bayram. Adi bayram. Bu, öküz ovu deyil, bu qaçanlardan heç kəs öküzü kəsib yeməyəcək. Heç kəs bu qaçanlara qara qəpik belə verməyəcək. Bəziləri hətta bu qaçdı-qovduda iştirak etmək üçün bir ətək pul xərcləyib uzaq ellərdən Pamplonaya təşrif buyurmuşlar. Niyə? Təhlükə hissini yaşamaq üçün. Yeknəsəq və cansıxıcı həyatın buxovlarından ani də olsa qurtulmaq üçün. Özünü təhlükə dolu macəralı həyat sürən ulu babalarına oxşatmaq üçün. Bəziləri həqiqətən də bu bayramdan şikəst çıxır,  bəziləri həlak olur.

 

İndi isə, əzizim Horasio, soruşa bilərsən ki, Pamplonanın Azərbaycana nə dəxli. Bu dəqiqə izah edim. Fərq var, amma bir o qədər yox.  Pamplonada bu bayram hər il eyni vaxtda, eyni gündə keçirilir, bizdə isə parlament və prezident seçkiləri günündə. Bizdə qovan şərti öküz vəzifəsinin icrası tapşırılır hüquq-mühafizə qurumlarının işçilərinə, qovulan-qaçanlar isə növbəti dəfə ənənəvi müxalifət liderlərinin “Vətən, Azadlıq, Qarabağ” nağıllarına inanmış sadəlövh gənclərdir. Qalan hər şey Pamplonadakı kimidir. Gənclər qışqırıb gicişir, öküzlər qaçıb qovur, bəzi gənclər qaçıb yaxasını qurtara bilir, bəzilərini isə yıxıb-tutub məhkəmələrdə şikəst edirlər. 

Vəssalam.

 

Zərdüşt Əlizadə

 

Kultura.az