Ən kiçik şedevrlər
Bir neçə kəlməylə bir çox şeyi demək, düşüncəl…
Bu yaxınlarda keçib getməyən uzun bir can
sıxıntısının yaratdığı narahatlıq hissiylə İvan Turgenevin “Rudin” ilə “Atalar
və oğullar”nı yenidən oxudum. Məlum olduğu kimi, “Rudin” müəllifin ilk qələm
sınaqlarından biridir. 1856-cı ildə işıq üzü görmüş romanı Turgenevin peşəkar ədəbi
həyatının başlanğıcı hesab etmək olar, eləcə də roman yaradıcılığının ən yaxşı
məhsulu. Çünki Rudinin həm həyatı, həm də ölümü daha mənalıdır, əsərdə təsvir
edilən Rusiya və baş qəhrəman öz dövrünün reallığına daha yaxındır. Növbəti illərdə
Bazarov meydana çıxdı – bu dəfə daha barışmaz xarakter və rus mənəviyyatına
daha yad element kimi.
Turgenevin hər iki qəhrəmanı, həmin dövr rus ədəbiyyatından
oxuduğumuz xarakerlərdən fərqli olaraq, Rudin və Bazarov, ədəbiyyatda, bəlkə də
elə adi həyatın özündə o vaxta qədər görünməyən yeni tip insanlardır. Bu “hirsli”
və qəribə, bir yandan da gərəksiz adamların vaxtı yetişmişdi; Turgenev ənənəvi
ilə yeninin qarşılaşmasından, həmişə olduğu kimi, nəsə qeyri-adi bir şeyin doğulduğunu
hiss edərək, “yeni insanlar görürdüm, amma necə hərəkət edəcəklərini, onlardan
nə gözləniləcəyini bilmirdim. Ya susacaq, ya da nə bilirdimsə yazacaqdım.
İkincisini seçdim” – yazırdı. Düzdür, Turgenevin
özü də yaratdığı Bazarovun ölçüyə gəlməyən nihilist gücü qarşısında başını
itirmiş və sanki bu, onu çox mənasız şəkildə öldürməsinə haqq qazandırmışdı, buna
baxmayaraq, 150 ili ötən həyatı ərzində Bazarov nəsillərarası qarşıdurmada haqqında
çox danışılan mühüm “avara” olmuşdur.
Əlbəttə, söhbət Bazarovdan gedirsə, bu həm də 19-cu
əsrdən danışmaq deməkdir. Turgenevin gördüyü və ədəbiyyata gətirdiyi “yeni
insanlar” nəyin xəbərçisi idi? Dövrə
nəzər yetirdikdə görürük ki, Avropada 19-cu əsrin sürətli sənayeləşməsinə
paralel olaraq, həyatın bütün sahələrində ənənə ilə yenilik arasında özünü göstərən
kəskin qarşıdurma vəziyyəti vardı. Bu vəziyyət qeyri-müəyyən və qarışıq ictimai
narahatlıq duyğusu – necə ki köhnə ilə yenin qarşılaşmasında bu, hər zaman qaçılmaz
bir prosesdir – yaratmışdı. Yeni sənaye cəmiyyəti və onun yaratdığı ictimai
formalar böyük dəyişikliklər bumunun arasında anlaqsız vəziyyətdə qalan fərdin hissi
olaraq bağlı olduğu hər şeyi, eləcə də mənəvi dünyasını amansızlıqla dağıdırdı.
Modern dünya heç nəyin daimi olmadığı,
yeninin arzulanaraq köhnə olanın rədd edildiyi bir formanı təmsil edirdi. İnsanın
köhnədən sahib olduğu hər şeyi təhdid edir, mənasızlaşdırırdı. Bu, rasional, tərəqqiyə
yönəlmiş dəyərlərin bütün insani hiss və duyğuları yox sayaraq imtiyaz
qazanması idi ki, fəlsəfə, sosiologiya, incəsənət və ədəbiyyatın hər biri öz
prespektivindən bu yeni vəziyyətə münasibət göstərməyə başlamışdı.
Sənayeləşmənin çox sürətli şəkildə özüylə birgə gətirdiyi modern cəmiyyət
idealı qoca qitə ilə üzvi şəkildə bağlı olan Rusiyadakı ictimai-siyasi həyata
da ciddi formada təsir göstərirdi. Turgenevin süst təhkiyəsinə baxmayaraq, biz bəhs
etdiyimiz ictimai narahatlıq duyğusunu 50-60-cı illərin yarı-təhkimli və ənənəvi
Rusiyasında görə bilirik. 19-cu əsrin ortalarındakı Rusiya ictimai həyatı içində
yerli və kənardan gəlmə hər növdən ideyaların qaynamağa başladığı, lakin altı hələ
yaxşı qızdırlmamış böyük qaba bənzəyirdi; çarın öldürülməsi ilə bu qabın altı
yaxşıca isindi və ondan yaxın zamanların özünəməxsus hadisəsi olan rus
kommunizmi çıxdı.
Sosial-iqtisadi dəyişikliklərin ən əhəmiyyətli tərəflərindən
biri də (yeni) ictimai reallığa incəsənətin və ədəbiyyatın başlıca sahələrindəki
yeni münasibət idi. Artıq hansısa ictimai məna ifadə edən insanı nə ideala olan
möhkəm inamı ilə Don Kixot, nə də bəşər övladını aliləşdirərək ilahi məziyyətlərlə
bəzəyən Hamlet təmsil edirdi. Bu kontekstdə ədəbiyyatda yeni, sənaye cəmiyyəti
reallığına uyğun xarakterlər meydana çıxmışdı ki, Eduard Said 19-cu əsrdə
yazılmış üç başlıca əsərə diqqət çəkirdi: “Atalar və oğullar” (İ.Turgenev), “Sentimental
təhsil” (Q.Flober), “Sənətçinin gənclik (yaxud gənc adam olaraq) portreti”
(C.Coys); “bu romanlarda ictimai reallığın təmsil edilmə forması yeni bir
aktorun, modern gənc intellektualın anidən səhnəyə çıxmasından hərtərəfli təsirləndi,
hətta müəyyənedici tərzdə dəyişdi”.
***
Bəlkə də Saidin gözündə Bazarovu qiymətli edən əsas
cəhət onun klişe, avtoritet və ənənəvi olan nə varsa heç birinin qarşısında əyilməsi,
güzəşt tanımayan inkarçı və tənqidi ruhudur; bu cəhəti ilə o, müəllifin “marjinal,
sürgün, yad” kimi çiləkeşləşdirdiyi intellektualı üçün, şübhəsiz, yaxşı prototipdir.
Bununla belə, məsələyə ənənə ilə yeninin qarşıdurması fonunda baxmasaq, əvəzində
bir qədər psixoanalitik kontekstdə baxsaq, Bazarov intellektualdan daha çox özünün
nihilist gücü ilə nə edəcəyini bilməyən və mənəvi olaraq böyük bir boşluğun
içində əzab çəkən, nəticədə dünyanın absurdu qarşısında başını itirən gənc
adamdan başqası deyildir. Lakin məsələnin problemli tərəfi ondadır ki, bu cür
düşünmək də onun ramedilməz, izahı mümkünsüz xarakter və dünyagörüşünü hansısa
sabit dəyərlərə bağlamağa imkan vermir; Bazarov bu baxımdan nəinki həyata
sığmır, hətta bir şəhər əfsanəsini xatırladır. Nə ailəsi, dostlarının çevrəsində
daldanaraq, nə də az-çox müdafiə etdiyi dəyərlərə ağız açaraq onu hansısa qəlibə
yerləşdirmək, əhliləşdirmək mümkün deyildir. Bazarov, sanki özü özünü yaradıbmış
kimi, qəlbinin yerinə daş qoyaraq özünü yaşlı ata və anasından çoxdan qopara
bilibdir. Onların göstərdiyi sevgi və şəfqətə qarşı laqeyiddir; instiktiv valideyin
sevgisi Bazarovun heçlik duyğusu qarşısında çərasizdir.
Bazarovun həyatına kino lenti kimi qısa şəkildə nəzər
salaq: qəfildən əyalət Rusiyasında meydana çıxır; insanların adət etdiyi həyat
tərzlərini, ənənələrini, düşüncə və duyğularını, yaşayış tərzləri və davranış
formalarını lağa qoyur; romantizmi rədd edir; cəmiyyətə hakim olan dəyərlərə, əxlaqa
qarşı yeni, materialist dəyərləri irəli sürür və onları müdafiə edir; klişelərə
hücum çəkir, onları tənqid edir; mövcud olan hər şeyə, eləcə də varlığa və
biliyə qarşı inkarçılığı və nihilizmin dağıdıcı gücünü qoyur; aşiq olur; duelə
çıxır; müalicə etdiyi bir kəndlidən xəstəliyə yoluxaraq ölür. Budur, hekayə
bitdi. Romanın sonuna doğru yaxınlaşdıqca elə bir təəssürat yaranır ki, sanki Turgenev
son nəticədə Bazarovla nə edəcəyini bilmir; tez-tələsik, hətta bayağı şəkildə
hekayəni sona çatdırmağa çalışır.
Biz qəfildən hiss edirik ki, həkim Bazarovun Kirsanov
(əmi) tərəfindən dueldə öldürülməsi daha mənalı olardı, lakin yazıçı buna
getmir, çünki bu halda Nihilistin ölümünün (Feniçka ilə yaxınlaşmasına görə) hansısa
axmaq bir mənası olacaqdı. Əvəzində, Turgenev onu taleyin ümidinə buraxır, Tanrıya
inanmayan Bazarov alnına yazılan ölümü yaşamalı olur – o, müalicə etdiyi bir kəndlidən xəstəliyə
yoluxaraq çox bayağı formada ölür.
Bazarov nə istəyir? Ailə səadəti, şan-şöhrət, ictimai
nüfuz qazanmaq, sevgi, zənginlik, güc, hakimiyyət, varlı-hallı dostlar,
valideyn qayğısı? Heç biri. Bunların heç biri onun vecinə də deyildir. Görünür,
Turgenevin özü də Bazarovun nə istədiyini bilmir. Bazarov harda rahatlıq tapır,
onun vətəni haradır? Odintsovanın yanı, yoxsa Feniçkanın? Sankt-Peterburqun daş
prospektləri, yoxsa əyalətin palçıqlı yolları? Yaşlı ata-anasının yanı, yoxsa
qurbağa gölməçəsi? Bunların heç biri. Bazarov bu baxımdan Bodlerin yurdsuz-yuvasız
sənətçisinin ilk canlı simvolu, modern kosmopolit intellektualın ilk təmsilçisi,
eləcə də ədəbiyyatda ilk dünya vətəndaşı, yaxud da ilk ümumdünya sərgərdanıdır.
Romanda Kirsanovla (əmi) Bazarov arasındakı ikinci,
nihilizmin nə demək olduğu aydınlaşan bir qədər uzun mübahisəyə nəzər saldıqda
görürük ki, bu dialoq vasitəsilə Bazarovun nihilist konsepsiyasına işıq tutulur.
Lakin, qəribədir ki, həm bu mübahisəli dialoqda, həm də romanın ümumi sujet xəttində
işlənən nəsillər arasındakı köhnə və yeni konfliktinin ciddi izlərinə baxmayaraq,
əsərin əsas qəhrəmanları arasında yaradılan ziddiyyət və qarşıdurma vəziyyəti səhti
(ya da süni) təsir bağışlayır, romanın baş mövzusu ilə uyğunlaşmır və fərqli
kontekstdə oxuna bilər.
Ata Kirsanovla oğlu Arkadi mahiyyət etibarı ilə və əsasən
eyni adamdırlar. Onlar arasında böyük düşüncə ziddiyyəti, dərin ata-oğul, köhnə-yeni
konflikt adlandırılacaq vəziyyət, demək olar ki, yoxdur. Arkadinin Şubert çalan
və ya Puşkin oxuyan atasına gülüşü Bazarovun həmin vəziyyətdəki kinayəli gülüşünü
andırmır. Bu, daha çox mərhəmət gülüşüdür. Ata fikirləşir ki, oğlu təhsil
aldığı mühitdə zərərli fikir və təsirlərin altına düşübdür, amma, görünür, ata,
bizim romanın lap əvvəlindən ya da onun coşğulu romantikaya qapıldığı andan təxmin
etdiyimiz kimi, Arkadinin taleyinin necə olacağını təxmin edə bilir; onun
Bazarovu təqlidi və ya müəlliminə pərəstişi (bu, həqiqətən də gözçıxardan bir təqliddir)
əsərin sonlarına doğru aydınlaşır. Nabokovun da diqqət çəkdiyi kimi, Arkadinin
qarşısıalınmaz gənclik ehtirası təbiilikdən məhrum nihilist məntiqinə qalib gəlir
və sonra ata ilə oğlun xoşbəxt ailə portreti bizə təqdim edilir. Romanın ardı
yazılsaydı, bəlkə də otuz il sonra rus klassiklərindən birini oxuyan yaşlı Arkadini
və ona gülən təhsilli oğlunu görə bilərdik. Lakin bu gülüş nə eqodan, nə
eksiztensial ağrıdan, nə də qərəzdən qaynaqlamayacaq, eynilə oğulun ataya mərhəmət
gülüşü olacaqdı.
Romanda əsas konflikt xətti Bazarovla Arkadinin əmisi
arasındadır. Lakin burdakı konfliktin ölçüsü başqadır. Əmi Kirsanovun Bazarova
qarşı hiddətinin başlıca və altşüurdakı səbəbi onun düşüncələrindən daha çox
ciddi saymazyanalığı və böyük kultuna hörmətsizliyi ilə əlaqəli təsir
bağışlayır. Bəlkə də Bazarov öz düşüncələrini bir qədər mülayim formada
açıqlasa və hörmətyana ifadə etsəydi, qarşımızda başqa bir mənzərə açılardı. Yəni
Pavelin Bazarova kininin əsasında ictimai motivdən daha çox şəxsi motiv durur.
Pavelin Bazarova qarşı müdafiə etdiyi rus ailə dəyərləri, prinsiplər, mental ənənələrin
heç birini nə onun keçmişində, nə də indiki yaşayışında görə bilirik. Onun
qardaşının gənc qadınına, kəndli qızı Feniçkaya qarşı duyduğu şəhvəti, yəqin
ki, çox az oxucu hiss edir; məlum duelin başlıca səbəbi qardaşının ləyaqətini
qorumaq deyil, məhz Feniçkaya qarşı duyduğu həmin şəhvət və Bazarova qarşı
kinini daha da alovlandıran qısqanclıq hissidir. Romanın sonunda bizə məlum
olur ki, Pavel bir daha geri qayıtmamaq şərti ilə Avropaya köçübdür. Olmaya, bu,
gəncliyindəki uğursuz sevgi hekayəsinin travmasından hələ də xilas ola bilməyən
əmi qardaşının gənc qadınına qarşı öz vəhşətli hisslərini idarə edə bilməməkdən
qorxub qaçıbdır?
Göründüyü kimi, uzun və çətin keçib gedən can
sıxıntısı ciddi narahatlıq yarada bilər, bununla belə, bu yazı heç vəclə roman
haqqındakı ənənənəvi yanaşma və təhlilləri inkar mahiyyətində deyildir.
Misir Məmmədli
Kultura.az